بس سنه کیم آغلایاجاق؟
گون گله‌جک من اؤلنده، چوخ دوداق‌لار بوزوله‌جک
«حاییف» دئیه گؤز یاشلاری یاناق‌لاردان سوزوله‌جک
قاتار-قاتار میصراعلاریم دوداق‌لاردا دوزوله‌جک
آیریلیغیم چوخ اوره‌یی چارین-چارپاز داغلایاجاق
بس سنه کیم آغلایاجاق؟
مجنون اولوب قالاسی‌یام، محبّتین چؤلونده من
حسرت‌لره دؤنه‌سی‌یم عشق اهلی‌نین دیلینده من
چینار اولوب بیته‌سی‌یم زامانلارین یولوندا من
هئیکل‌له‌نن عؤمروم-گونوم عصیرلری حاقلایاجاق
بس سنه کیم آغلایاجاق؟
چوخ گزمیشم دوستلاریم‌لا بو داغلارین اته‌یینده
مین-مین اؤلمز خاطیره‌م وار هر گولونده، چیچه‌یینده
نیسگیل‌لریم چالیندیقجا چوبان‌لارین توته‌یینده
یولدان اؤتن هر یولچونو ایختیارسیز ساخلایاجاق
بس سنه کیم آغلایاجاق؟
بیر کؤز کیمی اته‌یینده ساخلار منی داییم، کولوم
هر باهاردا چیچک آچار، هر پاییزدا سولان گولوم
بوینون اَیَن بنؤوشه‌لر، آغلار منه ظولوم-ظولوم
منیم آرزوم خالقین عشقی، سن قیردیقجا تاغلایاجاق
بس سنه کیم آغلایاجاق؟
من عشقدن یارانمیشام جان باغیشلار یارا، یار دا
باخ گؤر نئچه «نسیمی» تک بابالاریم قالدی داردا
«کرم»لریم اودا یاندی، «له‌له»لریم قالدی قاردا
واخت گله‌جک آه-آمانیم هیجران یولون باغلایاجاق
بس سنه کیم آغلایاجاق؟
پارچالانمیش اورک قانیم اولدو مزه‌ن، آغیز دادین
نسیل-نسیل بو نیفرتی داشییاجاق موردار آدین
تاریخ بویو ویصالیمی، سئوینجیمی اوغورلادین
اوغورلانان سئوینجیم ده "ستار" دئیب آغلایاجاق
بس سنه کیم آغلایاجاق...؟
✍🏻 ستار گل‌محمدی