ائل سوزی

گون گله‌جک من اؤلنده، چوخ دوداق‌لار بوزوله‌جک

«حاییف» دئیه گؤز یاشلاری یاناق‌لاردان سوزوله‌جک

قاتار-قاتار میصراعلاریم دوداق‌لاردا دوزوله‌جک

آیریلیغیم چوخ اوره‌یی چارین-چارپاز داغلایاجاق

بس سنه کیم آغلایاجاق؟

مجنون اولوب قالاسی‌یام، محبّتین چؤلونده من

حسرت‌لره دؤنه‌سی‌یم عشق اهلی‌نین دیلینده من

چینار اولوب بیته‌سی‌یم زامانلارین یولوندا من

هئیکل‌له‌نن عؤمروم-گونوم عصیرلری حاقلایاجاق

بس سنه کیم آغلایاجاق؟

چوخ گزمیشم دوستلاریم‌لا بو داغلارین اته‌یینده

مین-مین اؤلمز خاطیره‌م وار هر گولونده، چیچه‌یینده

نیسگیل‌لریم چالیندیقجا چوبان‌لارین توته‌یینده

یولدان اؤتن هر یولچونو ایختیارسیز ساخلایاجاق

بس سنه کیم آغلایاجاق؟

بیر کؤز کیمی اته‌یینده ساخلار منی داییم، کولوم

هر باهاردا چیچک آچار، هر پاییزدا سولان گولوم

بوینون اَیَن بنؤوشه‌لر، آغلار منه ظولوم-ظولوم

منیم آرزوم خالقین عشقی، سن قیردیقجا تاغلایاجاق

بس سنه کیم آغلایاجاق؟

من عشقدن یارانمیشام جان باغیشلار یارا، یار دا

باخ گؤر نئچه «نسیمی» تک بابالاریم قالدی داردا

«کرم‌»لریم اودا یاندی، «له‌له‌»لریم قالدی قاردا

واخت گله‌جک آه-آمانیم هیجران یولون باغلایاجاق

بس سنه کیم آغلایاجاق؟

پارچالانمیش اورک قانیم اولدو مزه‌ن، آغیز دادین

نسیل-نسیل بو نیفرتی داشییاجاق موردار آدین

تاریخ بویو ویصالیمی، سئوینجیمی اوغورلادین

اوغورلانان سئوینجیم ده "ستار" دئیب آغلایاجاق

بس سنه کیم آغلایاجاق...؟

✍🏻 ستار گل‌محمدی

کانال تلگرام ائل سوزی

آماندیر آمانت مزارا قویون

دوستلاریم گلنده اویادین منی

بلکه امکان اولدو بیرده گوروشدوک

دوستلاریم گلنده اویادین منی

ذوالفقار، زلیم خان، یا آتا ائللر

قویماز هر نادانا سیر ساتا ائللر

باکی دان قوناقی گلنده ائللر

دوستلاریم گلنده اویادین منی

عاشیق نباتی ام ائله باغلیام

سینه ام اوستون دویونیم داغلیام

دل غمینی ائللر اوچون چاغلیام

دوستلاریم گلنده اویادین منی

✍🏻 عاشیق محمد نباتی

بوگون ائله بیلكی تانیمیر منی
دونن آدام بیلیب ال وردیك لریم
ائوزوموزدن ایراخ دانییر منی
یالین آیاغینا نال وردیك لریم

كیمینه دوست اولدوم قهر گتیردی
ددیم چینیمده گئز یهر گتیردی
الیله سفره مه زهر گتیردی
الیمله آغزینا بال وردیك لریم

كیمینه دوست اولدوم كیمینه آتا
قویمادیم دار گونده او ایته باتا
اینانمازدیم منی ماناتا ساتا
الیمله الینه پول وردیك لریم

قانانا چكه سن زحمت چكنده
قانمازدا ایتمیه بیرجه تیكن ده
گوره سن یولوما تیكان اكنده
خجالت چكیرمی گول وردیكلریم
بهمن وطن اوغلو

ئوز آنا يوردومنان سؤز آچيرام من

قــــهرمان يـوردولودور آذربايجانيم

تــــوپراقي داشلاري باسيلماز قلعه

بــــاغچالي بــــاغليدور آذربايجانيم

ســــتّارخان باقرخـــان ياديگاريدي

ايـــــــران باستانين هاي هارايدي

اســـــلامين قــــرآنين سرايداريدي

آيــــــدين اوجاقليـــدور آذربايجانيم

شانــــلي قهرمانلار بيزيم يئريندي

قــــــــاضي خياباني بيزيم يئريندي

مينلر باكـــــــري‌لر بيزيم يئريندي

قوچاق اوغلانليـــدور آذربايجانيم

اردبيل مشگيني شــانـــلي اهري

مغان قـــره‌داغي هر تك‌تك يئري

ستارخان اؤلمييوب ديريدور ديري

قديم سراغليـــــــدور آذربايجانيم

قوش قونماز داغلاري بارلي باغلاري

سنگردن قاييتماز تورك اوغلانلاري

نبي كور‌اوغلو تك هاي هارايلاري

معدنلي كانليــــــدور آذربايجانيم

نظامي خـــاقاني بو ئولكه‌نين دي

شهريار شيدالار بو ئولكه‌نين دي

تاريخ يازان دوستي بو ئولكه‌نين دي

شاعر يغيناغليــدور آذربايجانيم

باسيلماز قلعه‌لـــــر نشانه‌‌‌سي وار

مين جورقهرمانليق حماسه‌سي وار

«بخشي»‌نين يوردونا خوش نغمه‌سي‌ وار

شوكتلي شانليـــدور آذربايجانيم

قوچ ايگيت‌لر بسليبدور
بيزيم ائللر بيزيم ائللر
آزادليقي ايسديبدور
بيزيم ائللر بيزيم ائللر

اونون هر بير بوجاقيندا
آتا بابا اَُجاقيندا
مين قهرمان قوجاقيندا
بسليبدور بيزيم ائللر

تبريزيم اودلار دياري
اوردا وار غيرت داماري
جنّت اولار هر بهاري
بيزيم ائللر بيزيم ائللر

قره داغی شانلي دیار
آذربايجانا افتخار
مينلرله ايگيت اوغلانلار
بسليبدور بيزيم ائللر

هر اولادي انسان تَكين
محروملارين وار كمكي
قوچ كوراوغلونی بابكي
بسليبدور بيزيم ائللر

فضولي واقف واحدي
ستارخاني باقرخاني
شهرياري هم شيداني
بسليبدور بيزيم ائللر

سهندي وار سبلاني
«منفردين» ديلده آدي
«دوستي» تاريخلار استادي
بسليبدور بيزيم ائللر

قوي گتيريم «بارز» آدين
«بخشي» كيمين قوجامانين
بسليبدور بيزيم ائللر
سيزه قربان ئوزوم ائللر

یازان استاد میرزا محمد بخشی

باخدیم دالیسیجا یار گئدنده
بیر یولدا دئدیم باخار گئدنده

باخدی قاپیدان گئچنده گولدو
بیلمیردی اوره‌ک‌ اومار گئدنده

باغلاندی دیلیم اوره‌کدن آمما
آز قالدی چئکم هاوار گئدنده

گئتمه، گئدیسن ؟ یاواش یاواش گئت
جانیم بیلیسن چیخار گئدنده؟

دؤندر گؤزونو، خومار – خومار باخ
قویما منی ده، خومار گئدنده

سنسیزلیگه دؤزمه‌گیم چتیندیر
گل جانیمی آل قوتار گئدنده

سندن سورا عشقی نئیلیرم من
آل عشقینی ده آپار گئدنده

مهر ایله نوازش ائیله بلکه
گول بیتسین اوره‌کده، قار گئدنده

من گؤر نه دئییردیم اؤز اؤزومله
قول بوینوما بیر سالار گئدنده

بیچاره اوره‌ک بولود کیمین دیر
گؤردوکجه سنی دولار گئدنده

دای « جعفری » بسدی شعر یازماق
سندن ده بیر آد قالار گئدنده …

کیم چئگنینه آلدی سالدی خلعت
سؤز اوستادی، شهریار گئدنده

شعر از استاد هوشنگ جعفری