قره باغ
قارتال گوتور منی قاناتلارونان
آپار قره باغی دولاندیر گتیر
سیر ایدک شوشادا جیدیر دوزونی
صونرا کلبجره لاچینا یتیر
چیخاخ خانکندینن بیرآز قیراغا
خوجالیا ساری یول آلیب گیدخ
گوز یاشی آخیدیب بیز بو توپراغا
قربان گیدنلرین روحون یاد ایدخ
اوردان فضولیا آقداما گیدخ
روحوم قاناتلانسین اوچسون بیرآزدا
قبادلودان گیچخ آشاغ آرازی
اوتوراخ دینجلک بیز زنگیلاندا
قارتال او ایللردن آستا کیچ نولار
تلسمه چاتاندا سن جبراییلا
احوالیم دییشر گوزلریم دولار
حسرتله باخاندا من جبراییلا
قارتال مرادیما یتیر سن منی
دویونجا دولانیم گوزل وطنی
ایله کی یئتیشدین سن بیزیم کنده
قانات چال دوره وور یره ین سنده
گزیم او یرلری من قاریش قاریش
اوپوم توپراغینی اوپوم داشینی
اوپوم وطنیمده کیمسه سیز قالمیش
من قریب آتامین مزار داشینی
سون دفعه گورنده نه ساچی آغدی
نه ده کی باخیشی بئله جه غمگین
اوننان آیریلاندا اوشاق اولسام دا
آتاملا بیر یاشدا اولاردیم یقین
کونلوم حسرتینن غبار باغلاییر
هارایلا قوینونا چاغیر قره باغ
آنام تنها قالیب آنام آغلییر
گوز یاشی قلبیمی یاخیر قره باغ
سنسیز یتیم قالدیم آخیر قره باغ
اوغروندا جان ویردی نیچه نیچه ار
فریاد ایت ناله چک باغیر قره باغ
گونش ده اوتانیر چیخماقا سحر
اوتانا اوتانا چیخیر قره باغ
اورییم دویونور هرآن سنینله
حسرتین اولومنن آغیر قره باغ
سینمه داغ چکدین اوز اللرینله
قالمیشام کیمسه سیز فقیر قره باغ
سنسیز یتیم قالدیم آخیر قره باغ
آتام غمگین غمگین سویوخ مزاردان
یوللارا بویلانیر باخیر قره باغ
اولوب دیریلریم یوز یول عذاب دان
اوتانج اورییمی سیخیر قره باغ
سنسیز یتیم قالدیم آخیر قره باغ
یازار النور قراری