یاسلی ساوالان
هر زامانكي باخيرام باشينا قار وار گؤرورم
اوغلو اؤلموش آنا تك گؤزلرين آغلار گؤرورم
هر طرفدن چكيليب سينه‌وه داغلار گؤرورم
آي آلان اوستونو غم چيسگيني، هر ياني دومان
آي ياغان باشينا غملر اودو، ياسلي ساوالان
گؤرموشوك يازدا كؤچك لرده چيچكلر آچيلار
هر طرفدن چيمنين سينه سينه گول ساچيلار
ماهنيلار قوشماغا باشلار يئنه ده قوشماچيلار
ياز گليب گئتدي يئنه گولمه دين اوچ آيدا بير آن
آي ياغان باشينا غملر اودو، ياسلي ساوالان
قرنيلر كئچدي سنين گولمه دي بير لحظه اوزون
قانلي ياش تؤكدو سارالميش اوزونه ياشلي گؤزون
غصّه دن دؤندو قارانليق گئجه اولدو گونوزون
نه سوران حاليني اولدو نه وئرن جيسميوه جان
آي ياغان باشينا غملر اودو، ياسلي ساوالان
آند وئررم سني او قانه بلنميش داشيوا
گئجه-گوندوز او گؤزوندن تؤكولن قان یاشيوا
اورگين درديني بيلدير او «سهند» قارداشيوا
سني وارليق- سني تانري- سني بو آه و فغان
آي ياغان باشينا غملر اودو، ياسلي ساوالان
سالارام ياديما بير لحظه او كئچميش لريوي
تؤكولن سنگ جفائيله او دورر ديش لريوي
ايزلرم بير بير او حئيرت يارادان ايش لريوي
هاميدان من سنين احوالينا آرتيق نيگران
آي ياغان باشينا غملر اودو، ياسلي ساوالان
ساكيت اول، آغلاما قوي بيرجه چكيلسين بو دومان
گون چيخيب ظولمتي بير يوللوقا قووسون بورادان
«نبي» گلسين، بوز آت اولسون يئنه داغلار آتيلان
«هجر»ين بلكه ييغيلسين گؤزو يولدان، آناجان
آي ياغان باشينا غملر اودو، ياسلي ساوالان
سؤندوره بيلمه دي گؤز ياشين اوركدن اودووي
چاغيريم قوي كؤمك ائتسين سنه اؤز اؤولاديوي
افتخاريله بوگون ذيكر ائده رم پاك آديوي
مرد اوغوللار بئجريب خلقه وئرن شؤهرت و شأن
آي ياغان باشينا غملر اودو، ياسلي ساوالان
«بابكين»گئتدي سه بوش قالمادي آمما قوجاغين
دولودور مين ائله اوغلان لاريلا هر بوجاغين
نه قد‌ر يئل اسه طوفان قوپا سؤنمز اوجاغين
اي بلالر سپري، خالقا يامان گونده آمان
آي ياغان باشينا غملر اودو، ياسلي ساوالان
چنلي بئلده «دلي لر» قوي يئنه قورسون بوساطي
قوچ كوراوغلو يئنه جولانه گتيرسين قيرآتي
هئچ زامان اصلين ايتيرمز او كي دوزگوندو ذاتي
آند اولا آديوا، آي گؤزلري آغلار- ياشي قان
آي ياغان باشينا غملر اودو، ياسلي ساوالان
سن دؤيوش لرده بير آسلان كيمي دوردون آياغا
اوخ آتيل ديقجا بيزه سينه ني وئردين قاباغا
غم يئمك دن داها جانيم يئتيشبدير دوداغا
نه يامان گونلره گؤر قالدي بو احساسلي بالان
آي ياغان باشينا غملر اودو، ياسلي ساوالان
بابالاردان بيزه قالميش بو مثل هاممي بيلير
سو گلن آرخا دئييب لر يئنه بيرگون سو گلر
فلكين داش اورگين آه اوخو آخيردا دَلر
«بارز» اوغلون دا يئتر سئوديگي ياره او زامان
آي ياغان باشينا غملر اودو، ياسلي ساوالان
مرحوم استاد بارز