ائل سوزی

آی آشیق نئینیرم هیجرانی، غمی؟!

منه سئوینج‌دن، ووصالدان دانیش!

نئینیرم حسرتی، نئینیرم بمی؟!

هارای چک، زیل اوخو، کامالدان دانیش!

سؤیله بو دونیانین نئچه‌دیر یاشی؟

سؤیله بو ازویون نئچه‌دیر قاشی؟

سؤیله خومار گؤزدن آخماسین یاشی!

او داغلار گؤزلی، مارالدان دانیش!

حیات یاشاماقدی، اؤلمکدن دئمه!

کول اولوب کؤز اولوب سؤنمکدن دئمه!

عهدینی باغلاییب دؤنمکدن دئمه!

عشقدن، سئوگیدن، خیالدان دانیش!

منه خزلدن یوخ، چیچکدن اوخو!

آرخامدا حاقّ آدلی کؤمکدن اوخو!

آنام بیشیردیگی چؤرکدن اوخو!

آتامین قازانجی حالالدان دانیش!

منی کئچمیشیمه قایتاران آشیق!

منه بابالاردان پای قالان آشیق!

اوتوروب ذیروه‌ده ساز چالان آشیق!

سن ائلدن، اوبادان، ماحالدان دانیش!

سنه سوز وئرمیشم، آی گوزل صنم!

ظنّ ائتمه سوز وئریب سوزومدن دؤنم

شاعیرلر ایچینده «خسرو خان» منم

دوداقدان، یاناقدان، جامالدان دانیش...!

✍ خسرو سرتیپی